மஹிந்த ராஜபக் ஷவின் புதல்வரான யோஷித்த ராஜபக் ஷவிடம் குற்றப் புலனாய்வுப் பிரிவு நேற்று 3 மணி நேரம் சிறப்பு விசாரணைகளை முன்னெடுத்தது. செஞ்சிலுவை சங்கத்தினால் யோஷித்தவின் தாயாரான முன்னாள் முதற் பெண் மணி ஷிரந்தி ராஜபக் ஷவின் சிரிலிய சவிய அமைப்புக்கு வழங்கப்பட்டு கடந்த 2011 ஆகஸ்ட் மாதம் முதல் 2015 ஜனவரி 20 ஆம் திகதி வரை அந்த அமைப்பின் கட்டுப்பாட்டில் இருந்த (WP) KA-0642 எனும் டிபண்டர் வண்டி தொடர்பில் இந்த விசாரணைகள் இடம்பெற்றன.
இதன் போது குறித்த டிபண்டர் வண் டியின் நிறம் மாற்றப்பட்டமை தொடர் பில் ஏற்பட்டுள்ள சந்தேகங்களை முன்னிறுத்தி குற்றப் புலனாய்வுப் பிரிவின் விஷேட விசாரணைப் பிரிவு
தீவிர விசாரணைகளை முன்னெடுத்ததாகவும், விஷேட வாக்கு மூலம் ஒன்றினை பதிவு செய்த பின்னர் யோஷித்த ராஜபக்ஷவை அங்கிருந்து வெளியேறிச் செல்ல அனுமதித்ததாகவும் பொலிஸ் ஊடகப் பேச்சாளர் பொலிஸ் அத்தியட்சர் சட்டத்தரணி ருவன் குணசேகர தெரிவித்தார்.
சிரிலிய சவிய அமைப்பின் கீழ் இருந்த செஞ்சிலுவை சங்கத்தினால் வழங்கப்பட்ட டிபண்டர் வண்டி தொடர்பில் பிரத்தியேக விசாரணை ஒன்று குற்றப் புலனாய்வுப் பிரிவினரால் முன்னெடுக்கப்பட்டுள்ளது. குற்றப் புலனாயவுப் பிரிவுக்கு பொறுப்பான சிரேஷ்ட பிரதிப் பொலிஸ் மா அதிபர் ரவி செனவிரத்னவின் நேரடி மேற்பார்வையில் அதன் பணிப்பாளர் சிரேஷ்ட பொலிஸ் அத்தியட்சர் சுதத் நாகஹமுல்ல, பிரதிப் பணிப்பாளர் சிரேஷ்ட பொலிஸ் அத்தியட்சர் சானி அபேசேகர ஆகியோரின் நேரடி கட்டுப்பாட்டில் விஷேட விசாரணைப் பிரிவின் பொறுப்பதிகாரி பிரதான பொலிஸ் பரிசோதகர் ரஞ்சித் முனசிங்க தலமையிலான பொலிஸ் குழுவினரால் இந்த விசாரணைகள் முன்னெடுக்கப்பட்டுள்ளன.
இந் நிலையில் நேற்று முன் தினம் அது தொடர்பில் விசாரணைக்கு உட்படுத்த சிரிலிய சவிய அமைப்பின் பொறுப்பாளராக செயற்பட்ட மஹிந்தவின் மனைவி ஷிராந்தி ராஜபக்ஷ குற்றப் புலனயவுப் பிரிவுக்கு அழைக்கப்பட்டார்.
குற்றப் புலனாயவுப் பிரிவின் அழைப்புக்கு இணங்க அவர் நேற்று முன் தினம் காலை 9.30 மணிக்கு குற்றப் புலனயவுப் பிரிவில் ஆஜரானார். அவரிடம் மூன்றரை மணி நேரம் விசாரிக்கப்ப்ட்டது.
இந் நிலையில் நேற்று காலை 10.15 மணிக்கு குற்றப் புலனயவுப் பிரிவில் ஆஜரான யோஷித்த ராஜபக்ஷவிடம் நண்பகலையும் நாண்டி பிற்பகல் 10.15 மணி தொடக்கம் 1.15 மணி வரையிலான 3 நேரம் விசாரணை நடாத்தப்பட்டது. இதனையடுத்து அவசியம் ஏற்படுமிடத்து மீள அழைப்பதாக கூறி யோசித்த விடுவிக்கப்பட்டார்.
