ஐக்கிய நாடுகள் மனித உரிமைகள் பேரவையின் 32ஆவது கூட்டத் தொடர் நாளை மறுதினம் திங்கட்கிழமை ஆரம்பமாகின்றது. எதிர் வரும் ஜூலை மாதம் முதலாம் திகதி வரை நடைபெறவுள்ள இக்கூட்டத்தொடரில் இலங்கை நிலைவரம் தொடர்பான வாய்மூல அறிக்கை சமர்ப்பிக்கப்படவுள்ளமையின் காரணமாக இலங்கைக்கு மிகவும் முக்கியத்துவமிக்க கூட்டத்தொடராக காணப்படுகின்றது.
அந்தவகையில் அரசாங்கததின் சார்பில் வெளிவிவகார அமைச்சர் மங்கள சமரவீர தலைமையிலான குழுவினரும் தமிழ்த் தேசியக் கூட்டமைப்பின் சார்பில் பாராளுமன்ற உறுப்பினர் எம். ஏ. சுமந்திரன் தலைமையிலான குழுவினர் ஜெனிவா நோக்கி பயணமாகவுள்ளனர்.
ஜெனிவாக் கூட்டத் தொடர் இன்று ஆரம்பித்தாலும் எதிர்வரும் 29 ஆம் திகதியே இலங்கை தொடர்பான வாய்மூல அறிக்கை ஐக்கிய நாடுகள் மனித உரிமை ஆணையாளர் செய்ட் அல் ஹுசேனினால் சமர்ப்பிக்கப்படவுள்ளது.
அந்தவகையில் எதிர்வரும் 28 ஆம் திகதி ஜெனிவா பயணமாகவுள்ள வெளிவிவகார அமைச்சர் மங்கள சமரவீர எதிர்வரும் 29 ஆம் திகதி உரையாற்றவுள்ளதுடன் உள்ளக விசாரணை பொறிமுறையின் தற்போதைய நிலைமை மற்றும் அதன் நடவடிக்கைகள் குறித்து விளக்கமளிக்கவுள்ளார்.
அத்துடன் இம்முறை ஜெனிவாக் கூட்டத்தொடரில் நல்லிணக்க செயலகத்தின் செயலாளர் மனோ தித்தவலவும் இலங்கையின் சார்பில் கலந்துகொள்ளவுள்ளார். மேலும் அரசாங்க உயர் அதிகாரிகள் மட்டக் குழுவும் இந்தக் கூட்டத் தொடரில் இலங்கையின் சார்பில் கலந்துகொள்ளவுள்ளது.
ஜூன் மாதம் 29 ஆம் திகதி இலங்கை தொடர்பான வாய்மூல அறிக்கை ஐக்கிய நாடுகள் மனித உரிமை ஆணையாளர் செய்ட் அல் ஹுசெனினால் சமர்ப்பிக்கப்படவுள்ள நிலையில் அந்த அறிக்கையில் நாட்டின் மனித உரிமை நிலைமை தொடர்பாக தான் மேற்கொண்ட மதிப்பீடு குறித்து விளக்கமளிக்கவுள்ளார்.
கடந்த பெப்ரவரி மாதம் இலங்கை வந்திருந்த செய்ட் அல் ஹுசேன் இலங்கையின் மனித உரிமை நிலைமைகள் குறித்த மதிப்பீட்டை செய்திருந்தார். அந்தவகையிலேயே ஐக்கிய நாடுகள் மனித உரிமை ஆணையாளரின் இலங்கை குறித்த வாய்மூல அறிக்கை மிகவும் முக்கியத்துவமிக்கதாக அமையும் என கூறப்படுகின்றது.
இம்முறை ஜெனிவாக் கூட்டத் தொடரில் இலங்கையின் உள்ளக விசாரணை பொறிமுறையில் சர்வதேச நீதிபதிகளை உள்ளடக்குவதா இல்லையா என்ற விடயம் முக்கியம் இடம்பிடிக்கும் என கூறப்படுகின்றது.
எனினும் மனித உரிமை மீறல்கள் மற்றும் யுத்தக் குற்றச்சாட்டுக்கள் குறித்து முன்னெடுக்கப்படும் உள்ளக விசாரணையில் எக்காரணம் கொண்டும் வெ ளிநாட்டு நீதிபதிகள் உள்வாங்கப்படமாட்டார்கள் என்றும் உள்நாட்டு நீதிபதிகளை கொண்டே விசாரணைகள் முன்னெடுக்கப்படும் எனவும் பிரதமர் ரணில் விக்ரமசிங்க அண்மையில் அறிவித்திருந்தார்.
இதேவேளை சர்வதேச நீதிபதிகளை எக்காரணம் கொண்டும் உள்ளக விசாரணை பொறிமுறையில் இணைத்துக்கொள்ளமாட்டோம் என்றும் உள்ளக நீதிபதிகளைக்கொண்டு விசாரணை முன்னெடுக்கப்படும் என்றும் ஜனாதிபதி மைத்திரிபால சிறிசேனவும் சில மாதங்களுக்கு முன்னர் மிகவும் வலுவான முறையில் குறிப்பிட்டிருந்தார்.
அந்தவகையில் அரசாங்கத்தின் இந்த நிலைப்பாடு வெளிவிவகார அமைச்சர் மங்கள சமரவீரவினால் ஜெனிவாவில் முன்வைக்கப்படும் என்றும் எதிர்பார்க்கப்படுகின்றது.
இந்தக் கூட்டத் தொடரில் அரசாங்கத்தின் சார்பிலும் தமிழ்த் தேசியக் கூட்டமைப்பின் சார்பிலும் கலந்துகொள்ளவுள்ள பிரதிநிதிகள் மனித உரிமை ஆணையாளர் செய்ட் அல் ஹுசேனை சந்தித்துப் பேச்சு நடத்தவுள்ளனர்.
இரண்டு தரப்பினருமே ஜெனிவா பிரேரணையின் அமுலாக்கம் தொடர்பிலேயே செய்ட் அல் ஹுசெனுடன் பேச்சுவார்த்தைகளை நடத்தவுள்ளனர். குறிப்பாக அரசாங்க தரப்பினர் தாம் சிறந்த முறையில் ஜெனிவா பிரேரணையை அமுல்படுத்திவருவதாக ஐக்கிய நாடுகள் மனித உரிமை ஆணையாளரிடம் தெரிவிக்கவுள்ளனர்.
ஆனால் தமிழ்த் தேசியக் கூட்டமைப்பானது ஜெனிவா பிரேரணையின் அமுலாக்கம் தொடர்பில் குறிப்பிடத்தக்களவு அதிருப்தியை வெளிக்காட்டும் என எதிர்பார்க்கப்படுகின்றது.
இது இவ்வாறு இருக்க கடந்த பெப்ரவரி மாதம் இலங்கைக்கு விஜயம் மேற்கொண்டிருந்த செயிட் அல் ஹுசைன் வெளிநாட்டு நீதிபதிகள் தொடர்பில் முடிவெடுப்பது இலங்கையினுடைய தீர்மானமாகும் என்று வலியுறுத்தியிருந்தார்.
