இந்தோனேஷியாவில் கடந்த 12 ஆண்டுகளாக அகதிகளாக வாழ்ந்து வரும் கீதா பாணு பிரணவன் என்ற இலங்கைத் தமிழ் தாயும் அவரது மகளும், மீண்டும் இலங்கைக்குத் திரும்புவதற்கு உதவுமாறு கோரிக்கை விடுத்துள்ளனர்.
தனது கணவர் போதிய மருத்துவ வசதிகள் கிடைக்காததால் 2022ஆம் ஆண்டு உயிரிழந்த நிலையில், தற்போது மகளுடன் தனியாக வசித்து வரும் அவர், உணவு மற்றும் தங்குமிடத்துக்கான உதவிகள் நிறுத்தப்படவுள்ளதாக அறிவிக்கப்பட்டுள்ளதால் பெரும் நெருக்கடிக்கு உள்ளாகியுள்ளார்.
குறித்த தாயின் கூற்றுப்படி, அவர்கள் 2014ஆம் ஆண்டு முதல் ஐக்கிய நாடுகள் அகதிகள் முகவரகத்தில் பதிவு செய்து இந்தோனேஷியாவில் அகதிகளாக வாழ்ந்து வருகின்றனர். கணவரின் மரணத்துக்குப் பின்னர், தாயும் மகளும் இந்தோனேஷியாவில் செயற்படும் அரச சார்பற்ற அமைப்பொன்றின் பராமரிப்பில் ஒப்படைக்கப்பட்டுள்ளனர்.
வேறொரு நாட்டுக்கு அனுப்பி வைக்கப்படுவார்கள் என எதிர்பார்த்திருந்த நிலையில், அது நிறைவேறவில்லை என அவர் தெரிவித்துள்ளார். மேலும், இந்த ஆண்டு ஜூலை மாதம் முதல் தங்கியிருந்த அறைக்கான வாடகைக் கொடுப்பனவு நிறுத்தப்பட்டதாகவும், உணவுக்காக வழங்கப்பட்ட உதவித்தொகை குறைக்கப்பட்டுள்ளதாகவும் குறிப்பிட்டுள்ளார். தற்போது அந்த உதவியும் நிறுத்தப்படவுள்ளதாக அறிவிக்கப்பட்டுள்ளதாக அவர் தெரிவித்துள்ளார்.
இந்தோனேஷியாவில் வேலை செய்வதற்கு அனுமதி இல்லாத நிலையில், மகளுடன் அங்கு தொடர்ந்து வாழ்வது கடினமாக இருப்பதாகவும், இலங்கைக்குத் திரும்புவதற்கு உதவுமாறு ஐக்கிய நாடுகள் அகதிகள் முகவரகத்திடம் பலமுறை மின்னஞ்சல் மூலம் கோரிக்கை விடுத்தும் பதில் கிடைக்கவில்லை என்றும் அவர் கூறியுள்ளார்.
தனக்கும் மகளுக்கும் ஆதரவளிக்க நெருங்கிய உறவினர்கள் எவரும் இல்லாத நிலையில், எதிர்வரும் காலத்தில் உணவின்றி தவிக்கும் நிலை ஏற்படலாம் என அச்சம் வெளியிட்டுள்ள அவர், தாயகத்துக்குத் திரும்புவதற்கு உரிய தரப்பினர் அவசரமாக உதவ வேண்டும் எனக் கண்ணீருடன் கோரிக்கை விடுத்துள்ளார்.
