மத்திய கிழக்கில் போர் மேகங்கள் சூழ்ந்துள்ள நிலையில், ஈரானின் தலைநகர் தெஹ்ரானில் வானத்திலிருந்து கருப்பு நிறத்தில் ‘நச்சு எண்ணெய் மழை’ பொழிவது உலகையே உலுக்கியுள்ளது. போர் என்பது ஆயுதங்களோடு மட்டும் நின்றுவிடாமல், இயற்கையையே நச்சாக மாற்றும் என்பதற்கு இந்தச் சம்பவம் ஒரு சாட்சியாக மாறியுள்ளது.

கடந்த சில நாட்களாக அமெரிக்கா மற்றும் இஸ்ரேல் படைகள் ஈரானின் முக்கியப் பகுதிகளில் அதிரடி வான்வழித் தாக்குதல்களை நடத்தி வருகின்றன. குறிப்பாக, கடந்த சனிக்கிழமை (மார்ச் 07, 2026) அன்று தெஹ்ரானில் உள்ள பிரம்மாண்ட எண்ணெய் ஆலைகள் மற்றும் எரிபொருள் கிடங்குகளை இலக்கு வைத்து ஏவுகணைகள் ஏவப்பட்டன.

இந்தத் தாக்குதலின் விளைவாக, அல்போர்ஸ் (Alborz) எண்ணெய் சுத்திகரிப்பு நிலையங்களில் மிகப்பெரிய தீ விபத்து ஏற்பட்டது. இதிலிருந்து வெளியேறிய பல டன் கணக்கிலான கரும்புகை வான்மண்டலத்தை ஆக்கிரமித்தது. இந்த ரசாயனக் கழிவுகள் மேகங்களுடன் கலந்து தற்போது கருப்பு நிற மழையாகப் பொழிந்து வருகிறது.

சமூக வலைதளங்களில் வைரலாகி வரும் வீடியோக்களில், கார் கண்ணாடிகள் மற்றும் கட்டிடங்கள் மீது விழும் மழைத்துளிகள் தார் போன்ற கருப்பு நிறத்தில் இருப்பதைக் காண முடிகிறது. மேலும், அந்தப் பகுதி முழுவதும் பெட்ரோலிய எண்ணெய்க்கான கடுமையான நெடி வீசுவது மக்களைப் பீதியில் ஆழ்த்தியுள்ளது.

இந்த நச்சு மழையில் கந்தகம் (Sulfur), நைட்ரஜன் ஆக்சைடு மற்றும் ஆபத்தான ஹைட்ரோகார்பன்கள் கலந்துள்ளதாகப் போர் கால ரசாயன நிபுணர்கள் எச்சரிக்கின்றனர். இந்தத் துளிகள் மனித உடலில் பட்டால் தோல் எரிச்சல் மற்றும் கடுமையான தீக்காயங்கள் ஏற்பட வாய்ப்புள்ளதாகக் கூறப்படுகிறது.

ஈரான் ரெட் கிரசண்ட் (Red Crescent) அமைப்பு விடுத்துள்ள எச்சரிக்கையில், இந்த மழையில் நனைந்தால் அல்லது அந்த காற்றைச் சுவாசித்தால் நுரையீரலில் கடுமையான பாதிப்புகள் ஏற்படும் எனத் தெரிவிக்கப்பட்டுள்ளது. இதனால் தெஹ்ரான் மக்கள் அத்தியாவசியத் தேவையின்றி வீட்டை விட்டு வெளியே வர வேண்டாம் என அறிவுறுத்தப்பட்டுள்ளனர்.

இஸ்ரேல் மற்றும் அமெரிக்காவின் இந்தத் தாக்குதல் ஈரானின் பொருளாதாரத்தை முடக்குவதோடு மட்டுமல்லாமல், அங்குள்ள பொதுமக்களின் சுகாதாரத்திற்கும் மிகப்பெரிய அச்சுறுத்தலாக மாறியுள்ளது. சுற்றுச்சூழல் ஆர்வலர்கள் இதனை ஒரு ‘சுற்றுச்சூழல் பயங்கரவாதம்’ எனச் சாடி வருகின்றனர்.

ஈரான் அரசாங்கம் இந்த விசித்திர மழை குறித்த அதிகாரப்பூர்வமான அறிவியல் அறிக்கையை இன்னும் வெளியிடவில்லை என்றாலும், கள நிலவரம் மிகவும் மோசமாக இருப்பதாகத் தகவல்கள் தெரிவிக்கின்றன. மழை நீர் நிலைகளில் கலந்தால் குடிநீர் ஆதாரம் பாதிக்கப்படும் அபாயமும் நிலவுகிறது.

தற்போதைய போர்ச் சூழலில் ஏவுகணைகளுக்குப் பயந்து பதுங்கு குழிகளில் தஞ்சமடைந்த மக்கள், இப்போது வானத்திலிருந்து விழும் இந்த இரசாயன மரணத்திற்கும்’ பயந்து கதவுகளை மூடிக்கொண்டு முடங்கியுள்ளனர். போரின் கோர முகம் இயற்கையைச் சிதைப்பதன் உச்சகட்டமே இந்த கருப்பு மழை.

சர்வதேச நாடுகள் இந்த விவகாரத்தில் தலையிட வேண்டும் என்றும், இரசாயனப் பாதிப்பிலிருந்து மக்களைக் காக்க அவசர உதவி வழங்கப்பட வேண்டும் என்றும் கோரிக்கைகள் எழுந்துள்ளன. ஈரானின் வானம் கருமை நிறமாக மாறியிருப்பது அந்த நாட்டின் எதிர்காலத்தையே கேள்விக்குறியாக்கியுள்ளது.