பிரான்சு தமிழ்ச்சோலைத் தலைமைப் பணியகத்தினால் ஆண்டுதோறும் நடத்தப்படும் மாவீரர் நினைவு சுமந்த தாயக வரலாற்றுத் திறனறிதல் 2025, ஆறாவது ஆண்டாக, நவம்பர் 15 சனி மற்றும் 16 ஞாயிறு ஆகிய இரு நாட்களில் பிரான்சு நாடுதழுவியதாகவும் உலகளாவியதாகவும் இடம்பெற்றது.
இணையவழியாக நடைபெறும் தாயகவரலாற்றுத் திறனறிதலில் இம்முறை 1138 தமிழ்ச்சோலை மாணவர்களும் 735 பொதுமக்களுமாக பங்கேற்றிருந்தனர்.
இவ்வாண்டு, ஒரே சமயத்தில் ஆயிரக்கணக்கானவர்கள் திறனறியும் வகையில், சிறப்பியல்பான இணையவழித் தேர்வுத்தளத்தை தமக்கெனச் சொந்தமாக உருவாக்கி, புத்தாக்கத் தொழில் நுட்பப்பாய்ச்சலைக் கையாண்டு, தமிழ் இளந்தலைமுறையினர் வினைத்திறன் படைத்துள்ளனர்.
தமிழ்ச்சோலை மாணவர்கள், 15 அகவைக்குட்பட்டோர்; மேற்பட்டோர் என இருபிரிவுகளாகவும், அதேசமயத்தில் உலகளாவிய அடிப்படையில் பொதுமக்களும் தாயகத் திறனறிதலைச் செய்வதற்கான வாய்ப்பும் வழங்கப்பட்டிருந்தது.
தாயகவிடுதலைக்காகப் போராடிக் கொண்டிருக்கும் ஈழத்தமிழினத்தின் இளந்தலைமுறையினர் தம்மினத்தின் வரலாறு தெரியாமல் வளர்ந்துவிடக் கூடாது.
‘’மனிதர்களின் இருப்பைவிட மனிதர்களின் செயற்பாடே போராட்ட வரலாற்றின் சக்கரத்தைச் சுழற்றுகின்றது.’’. தேசியத் தலைவர் மேதகு வே. பிரபாகரன்.
வரலாற்றைப் பேணவும் கற்றறிந்திடவும் வரலாற்றுத்தேடல் திசைநோக்கி நகர்ந்திட இளந்தலைமுறையினரைத் தூண்டிவிடும் உந்துவிசையாகவும் இவ்வரலாற்றுத் திறனறிதல் அமைகின்றது.
தாயகவரலாற்றுத் திறனறிதலின் பொருளுணர்ந்து சிறப்புணர்ந்து மாணக்கர்களுக்கு ஊக்கமளித்து அனைத்து வழிகளிலும் ஒத்துழைப்பு நல்கிய தமிழ்ச்சோலை நிர்வாகிகள், ஆசிரியர்கள், பெற்றோர்கள் அனைவருக்கும், தமிழ்ச்சோலைத் தலைமைப் பணியகம் தனது நன்றியினையும் பாராட்டுதல்களையும் தெரிவித்துக் கொள்கின்றது.
மாவீரர் நினைவு சுமந்த தாயக வரலாற்றுத் திறனறிதல் 2025 இல் தமிழ்ச் சோலைப் பள்ளிகள் ஊடாகக் கலந்து உயர் புள்ளிகளைப் பெற்ற 6 மாணவர்கள் பிரான்சில் இடம்பெறும் மாவீரர் நாள் நிகழ்வு மண்டபத்தில் மதிப்பளித்து வைக்கப்படவுள்ளனர்.
அவர்களின் பெயர் விவரங்கள் வருமாறு:-
15 வயதிற்கு உட்பட்டவர்கள்
SINNATHAMBY Srinithaa- சின்னத்தம்பி சிறிநிதா- NEUILLY SUR MARNE
RAJARATNAM Shanuga – இராஜரட்ணம் ஷானுகா- NOISY-LE-GRAND
KIRUPALAN Jeyavarman – கிருபாலன் ஜெயவர்மன்- STRASBOURG
15 வயதிற்கு மேற்பட்டவர்கள்
THAVANESAN Akisha – தவனேசன் அகிசா- BEAU SOLEIL
BALASUBRAMANIAM Abisana – பாலசுப்பிரமணியம் அபிசனா -NOISY-LE-GRAND
KRISHNAMOORTHY Arthika – கிருஸ்ணமூர்த்தி ஆர்த்திகா- CERGY – 1
